Fir den 10. Anniversaire vun hirer Grënnung huet de Justizministère d’Membere vum « European Network on Victims' Rights (ENVR) » zu 🇱🇺 empfaangen. Vum 19. - 21. November waren d’Experte fir hir Generalversammlung bei eis am Land. D’Justizministesch Elisabeth Margue huet bei dëser Geleeënheet dovu profitéiert fir d’Wichtegkeet vun den Experte fir d‘Rechter vun den Affer, ze ënnersträichen: „All Strofdot ass e Verbrieche géint d'Gesellschaft an eng Verletzung vun den individuelle Rechter vun den Affer. Dofir mussen d'Affer mat Respekt, Sensibilitéit a Professionalitéit unerkannt a behandelt ginn, an dat ouni iergendwellech Diskriminéierung.“ Méi Infos 👉 https://gd.lu/bn0Rjb

Mir wëllen de Schutz vun den Affer stäerken. Dofir war et wichteg, datt mir grad géint Gewaltverbriechen e kloert Zeeche setzen. Mat der Ännerung vum Artikel 195-1 aus dem Code de procédure pénale, déi haut an der Chambre des Députés Grand-Duché de Luxembourg gestëmmt gouf, soll erreecht ginn, datt bei schlëmme Strofdote, also enger Verurteelung zu méi ewéi 2 Joer, manner séier Sursis geschwat gëtt. Sou muss de Riichter an d’Zukunft net méi extra motivéieren, wann hie bei schwéiere Strofdote kee Sursis sprécht, och a Fäll vun Ersttäter. Am Justizministère schaffe mir nach u weidere Schrëtt géint genderbaséiert an haislech Gewalt: ✔ Méi Moyene géint Onlinegewalt wéi Cyberharcelement ✔ Méi Moyene géint aner Gewaltforme wéi psychologesch Gewalt ✔ Méi Moyene fir den Afferschutz #Lëtzebuergstäerken #Mënscheschützen

D'Justizministesch an d’delegéiert Ministesch fir Medien a Connectivitéit Elisabeth Margue huet sech mat Vertrieder vum Conseil National des Personnes Handicapées Info-Handicap Asbl getraff, fir e.a. iwwer d'Ëmsetzung vun der Konventioun iwwer d'Rechter vu Persoune mat enger Behënnerung (CRPD) ze diskutéieren. Dobäi stoungen natierlech d’Punkten an de Beräicher Medien a Justiz am Mëttelpunkt. Sou ass wichteg, datt zu Lëtzebuerg engersäits d’Recht vun all Mënsch op Informatioun an den Zougang zu de Medie garantéiert gëtt, an datt anerersäits d’Autonomie vu Mënsche mat enger Beanträchtegung gestäerkt gëtt, och wa Schutzmoossname geschwat goufen. Hei schafft de Justizministère un enger breeder Reform vum gesetzleche Kader fir de Schutz vun Erwuessenen. Infohandicap huet der Ministesch hir Prioritéite fir d‘Reform an hir Bedenke par Rapport zu den aktuelle geriichtleche Schutzmoossnamen duergeluecht.

Fir déi 5. Editioun vum ANELD Career Day huet d'Justizministesch Elisabeth Margue op hirer Journée a Foire deelgeholl, déi vun der Nationaler Associatioun vun de lëtzebuergeschen Droitsstudenten ANELD - Association Nationale des Étudiants Luxembourgeois en Droit organiséiert gouf. Dës Foire, déi grouss Affekotecabineten, Vertrieder vu Justiz an ëffentlech Institutiounen an aner wichteg Acteuren zesummebréngt, ass an d’Liewe geruff gi fir dass jonk Juristen e Stage oder souguer eng Aarbecht fanne, eng Kandidatur kennen ofginn oder einfach mat Vertrieder aus dem ëffentlechen a private Secteur interagéiere kënnen, déi um Event präsent waren. An hirer Begréissungsried huet d'Ministesch d'Organisateure fir hir Initiativ gelueft a betount: "Egal ob dir als Magistrat, Affekot, Notaire, Dierwiechter oder Beamten am Déngscht vum Staat sidd, de Beruff vum Jurist dréit zum gudde Fonctionnement an der Effizienz vum Justizsystem bäi, an ass och e Mëttel fir Verännerungen an eiser Gesellschaft ze gestalten." Wärend hirem Mandat wëll d'Elisabeth Margue verschidde Reformen am Justizsystem ëmsetzen, besonnesch wat d'Rekrutéierung an der Justiz ugeet. Awer och de Schutz vum Affekote Beruff ass e wichtegt Uléiss fir si. 📸ANELD - Association Nationale des Étudiants Luxembourgeois en Droit